Wanneer die son sak oor die Sondag...

-
My een Afrikaanse juffrou het altyd gesê: "...as ek vir jare in die ruimte was, en ek kom terug aarde toe op 'n Sondag, sal ek weet dis Sondag..."

En ek weet presies wat sy bedoel: verál hier teen 5uur, wanneer die son sak en die aarde tot ruste kom. Dis asof die Sondag begin afwen en die Maandag begin opwen. Aan die een kant voel jy die rustigheid van die Sondag in jou murg kom lê en nog so bietjie warmte gee, maar terselfdertyd voel jy hoe jou spiere begin opwarm en energie opbou vir die Maandag wat op die drumpel staan. Jy weet mos daardie gevoel...

Ons het 'n "tradisie" geskep om na Sondag middagslapies op ons voordeur trappies te sit en koffie drink en dis daar waar ek gister die opwen-afwen 'n naam gee. Ek onthou ander Sondae soos die...


Wanneer jy op skool is en 'n besige sportnaweek gehad het: hetsy atletiek, of netbal... en as jy gelukkig was kon jy dit afsluit met 'n lekker skoolsokkie die Saterdag aand. Sondag oggend kerk en Sondagskool en lekker Sondag middag ete, met huiswerk wat iewers tussen-in ingepas word, dalk wanneer Pa en Ma 'n middagslapie vang, want watter skoolkind doen nou dit? Dan, wanneer jy vreedsaam, met jou huiswerk klaar gedoen, voor die T.V. gaan sit-lê... dís wanneer jy, deur die program wat jy kyk, bewus word van daardie gevoel van afwen-opwen. Dalk is jy opgewonde om iemand spesiaal te sien by die skool - en meesal op skool is daardie iemand mos salig onbewus van jou bestaan, maar hulle bestaan maak jou héle dag. Ek het een keer 'n vriendin op Universiteit gehad wat hierdie ou in die eetsaal ge-"eye" het, sy het dit so geniet om hom net te "bewonder uit die verte", totdat iemand vir haar sy naam gesê het. Sy was onmiddellik kwaad, want dis té veel inligting, sy wou net met die fanstasie in haar kop aangaan oor wie hy is en wat hy "swot". Dis mos hoe dit baie maal op skool ook is. Of dalk is jy effens bekommerd oor 'n toets of 'n taak wat nog gedoen moet word of dalk nie die aandag gekry het wat dit moes nie. Dit is alles gedagtes en emosies wat deur jou vloei terwyl die Sondag afwen en die Maandag opwen.

Ek onthou Universiteits Sondae: Saterdag se bokjol is verby, jy het laat geslaap en was net betyds (of nie) om jou pastei in die eetsaal te kry - dit was Sondag ontbyt by TUKS in die '90s en dan is jy maar daar in jou kamer rond, met swottings of lui wees, want studente gaan nie oggenddiens toe nie (behalwe as jy verskriklik na jou ma'le en huis verlang...) Sondag middagete en wat-ookal-studente-aanvang na middagete is verby en dan begin jy reg maak vir die aanddiens en dís wanneer jy oor Universiteitsoord se parkeerterrein stap, met die jakarandas om jou, dat jy die opwen-afwen ritme inasem en besef jou naweek is amper verby, maar jy kan nog so effens rustig wees en die Here gaan loof saam jou maats en die laaste sluk uit die Sondag-houer vat, voor jy in jou koshuisbed klim en die alarm stel vir Maandag oggend se klasse. Dis ook presies wanneer jy sal weet of jy genoeg afgewen het die naweek en die veer styf genoeg gespan is vir dinamika maar ook 'n volhoubare pas vir die week.

Dis wat ek onthou, wanneer die son sak oor die Sondag...


Opmerkings

Plaas 'n opmerking

Gewilde plasings van hierdie blog

Geld wat stom is...

-
Prent
... maak reg wat krom is, lui die spreekwoord mos. En dis nogal ñ slim spreekwoord daardie wat in heelwat omstandighede gebruik kan word. (Een van een van die Gymlede se luukse karre... Roux kan nie die prys nuut opspoor nie, maar daar is een tweedehands met 1900km op die klok... vir R4,2miljoen rand) Maar dat dit stom is, is so... en daarom voel ek verplig om die stommegeid met ñ paar "gevleulde woorde" te vul. VISA het dit nie ver mis met hul prys wat hulle op sekere dinge in hul advertensie sit & dan is die situasie "priceless" nie en ons stem heelhartig daarmee saam, dis hoekom ons dit so maklik ons eie gemaak het met na-geaapte Facebook statusse ens. Want dit is so... daar ìs dinge wat geld nie kan koop nie, maar dan is daar ook die dinge wat gekoop word, wat die geldelike waarde nie ñ akkurate indikasie gee van hoeveel dit eintlik werd is nie. Laat ek verduidelik... Geld, volgens my... het twéé waardes: ñ numeriese waarde (R20 is R20)... maar d...
Lees meer

...soos 'n Koning Rooibekkie...

-
Prent
Hierdie is 'n foto van 'n Koning Rooibekkie ("Pin-tailed Whydah", vir die wat in Ingels voëls kyk)... en soos mens duidelik op die foto kan sien is hy 'n bakleier. Hy duld nie ander voëls in dít wat hy voel sý gebied is nie (dalk is die foto van 'n mannetjie, wat 'n wyfie probeer verlei ek weet nou nie, want ek is nie so goed met die identifisering nie en die arme vroutjies in die voëlkoninkryk trek mos maar aan die kortste ent wat "looks" betref)... inelkgeval... die Koning Rooibekkie herhinner my aan 'n Jack Russell hondjie, wat dink hy is 'n Doberman en wat al wat hond is aanvat, selfs al is hul twee maal sy grootte. So sal die Koning Rooibekkie ook nie skroom om die duiwe weg te jaag, wat BAIE groter as hy is nie. En die duiwe skrik, hoor! Maar daar is ook ander voëls, wat hulle nie steur aan die lawaaierige voël, met sy lang stert nie, soos die Lysters... en hul eet lustig/rustig voort. Wat interessant is van die Koning Rooibekk...
Lees meer

Die identiteit stryd...

-
Prent
Een oggend gesels ek en 'n hartsvriendin so tussen-deur haar gym sessie oor die dinge wat pla, die dinge wat frustreer en irriteer en bekommer. Sy is 'n Ma van 3 laerskool seuns met 'n man wat sy eie besigheid en boerdery het en uit 'n familie kom wat sport-mal is, so sy is besig! Verder het sy ook 'n "A-tipe" persoonlikheid, soos sy dit noem, en dis eintlik maar net 'n lettertjie vir iemand wat perfeksionisties is en hou van detail. Wat wonderlik is vir haar man en seuns en mense, maar nogal erge druk op haarself sit, want daar is net sòveel ure in 'n dag, mens kan net sò vinnig van Witrivier af Nelspruit toe ry en daar is net sòveel detail, wat jyself kan doen, en daarna het jy òf hulp nodig (dié tipe persoonlikheid vra ook nie maklik vir hulp nie), òf jy moet, tot jou eie frustrasie dit net los... En ek kry hierdie openbaring, terwyl ons gesels, wat ek voel ek moet neerpen voordat dit verdwyn, 'n openbaring oor die vrou se identiteit stryd.....
Lees meer