Vakansie maak vet!

Dit moet dit wees, want ek is nou net ‘n week met vakansie en ek is klaar vetter! Dalk is dit die…

Vleis?

Dit is eintlik al wat ek meer van eet as dit vakansie is. Braaivleis en Skaapboud en Biltong, maar vleis is mos proteïene en is mos nie eintlik veronderstel om vet te maak nie, maar dit moet dit wees!

Afskakel?

Dis wat ek doen as ek op vakansie is. Ek weet nie eers watter dag van die week dit is nie, ek laat die kinders begaan met hulle ge-TV kyk en het defnitief ook meer geduld met hulle. Ek worry ook nie as die kombuis nie silwerskoon is nie – dis mos waarom die Opwaskamer ‘n deur het en ek 'n skottelgoedwasser het, maar ongelukkig kan mens mos nou nie alles in die skottelgoedwasser pak nie. Maar ek stres nie daaroor nie en alles is net meer ontspanne. Ek sweer dit maak vet?!

Kersfees?

Kersfees moet vet maak: dalk die kerskoek, wat nou al 3 maande terug gebak is en lekker gedoop is in die brandewyn - dalk tel die maandelikse kalorieë op? Maar ons het vandag vir die eerste keer daarvan geëet?! Kan dit so vinnig vet maak? Ons het gister vir ure in die winkels rondgeloop en kersinkopies gedoen en kersbome gekyk en liggies... dit is mos nie veronderstel om vet te maak nie, maar ek is séker dis daarna wat ek nou regtig begin “dik” voel het.

Alkohol!

Maar nie eers baie nie… ons drink net elke aand ‘n ou wyntjie of dalk ‘n G&T, as daar is. Ook net enetjie, want almal weet mos ek is “goedkoop en maklik”… goedkoop om voor drank te koop – want ek drink net 1 drankie, dan het ek genoeg gehad en maklik om oor die weg mee te kom!

Netflix!

Dit moet die oorsaak wees van die skielike vet-gevoel! Want nou kan ek mos darem bietjie fliek! Ou flieks, nuwe flieks, reekse (tans is Friends, Big Bang Theory en Prison Break deel van die lys wat opkom wanneer ek my profiel oopmaak. Ja, ek en Dewald het uiteindelik Prison Break ontdek!). En wie kan nou ‘n “soppy”, romantiese Kersfeesfliek weerstaan as jy nou regtig in die 'krismis spirit' wil kom!

Sosiale Media!

Dit! Maak! Vet! Ek dink die kos wat jy daarop kyk, selfs die oefen-hacks en haar-hacks en funny fails! Dit moet vet maak, want dis eintlik maar al wat ek bietjie meer tyd aan spandeer as dit vakansie is. En ek self het al ‘n paar oulike reels gemaak op Instagram en foto’s gedeel op Facebook. Dit maak sekerlik vet, want dis al wat ek aan kan dink wat ek meer van doen, wat my klere reeds knapper kan laat sit!

Inlê… In die bed!

Bietjie wakker word sonder ‘n alarm en dan weer bietjie inkruip en dalk nog bietjie slaap. Dit dra verseker by tot die vet-gevoel. Maar dis mos wat mens doen op vakansie! Want jinne die hele jaar is dit een dol gejaag van die een plek na die ander. Selfs die “lekker” goed moet mens voor alarms stel en na toe jaag! Nee jinne, dis sekerlik dan wat mens help in jou klere pas, al maak dit ons moeg en put ons uit?!

Eiers!

Ek dink dis eintlik die ding wat ons versigtig voor moet wees op vakansie! En dis defnitief waar ek nou al my vet gaan staan en optel het! Nie net daardie rituele “bacon en eiers" tuisgemaakte brunch en/of Wimpy en/of Spur ontbyt nie, maar eerder die weggesteekte eiers! Die wat in die koek gebruik word, die sjokoladekoek en die wortelkoek en die rooi fluweel koek en daardie stukkie koek wat mens by Mugg & Bean deel as jy jou vriendin uiteindelik te siene kry, en darem maar ietsie lekkers kan eet, want julle verdien dit na die vreeslike jaar. Deel help nie eers as dit vakansie is nie! En daardie eiers wat hulle in die regte-egte lekkerste mayonnaise gebruik, wat jy broccoli slaai en aartappelslaai en tunaslaai en watookal mens met lekker mayonnaise maak, mee maak! En pasta! Ek is seker hulle gebruik eiers om pasta ook te maak? En pastei deeg – kry dit nie ook eiers in nie? Ek is seker die lekker pastei-deeg het eiers in?

Ja-nee… dis nou maar een ding wat nie twee is nie: vakansie maak vet! Dit moet ons nou maar net aanvaar! Maar darem word ons ook vol van samesyn en seëninge tel en onsself herlaai en dinge gedoen kry wat ons nooit doen, sodat die nuwe jaar meer georden en reggepak en weggepak en vol goeie voornemens en planne en kreatiewe idees begin kan word.

En dan moet jy maar net van voor af weer maer word!

Moet net nie vir jou groter klere koop nie – dis wat my Ma altyd sê, want as jy eers vir jou groter klere gaan koop dis dan wat jy die stryd gaan verloor! Kyk, vandag se klere rek inelkgeval baie meer as die van 40 jaar terug, so laat dit maar bietjie rek! Trek vir nou eers die aan wat meer kan rek, of daardie paar wat jy een keer gekoop het en jy nou as jou "fat pants" sien as dit "daardie tyd van die maand" is en jy jouself toestemming gee om gemaklik te voel... en maak maar die belt een gaatjie verder vas, maar laat dit jou maar herhinner dat die vakansie verby is en jy nou weer moet ophou met die V-A-K-A-N-S-I-E-dinge!

Maar vir nou hou ek vakansie tot die sesde Januarie… en weet dis dit wat vet maak! Niks anders nie!