Ons storie van hoop...

-
Ons storie is ñ storie van hoop... van die Bybelse: geloof, hoop & liefde... tot die aardse: "ons hoop vir die beste" & soos alle dinge, wat God ons op voorberei, kom dit ñ lang pad... van enkeling wees en smag na ñ maat, tot jong getroudes wees en smag na die wonder van ouers word. Die gesmag het gepaard gegaan met ñ lang gewag, baie bid... en huil.. en toetse en uiteindelik die besluit op IVF ("in vitro fertilisation") en die merkwaardige voorreg om, in detail, deel te wees van wanneer wetenskap ophou en God aanhou. So het ons die nuus gekry dat ons ñ tweeling gaan hê en die ekstra bederf, dat dit ñ seuntjie en ñ dogtertjie is... 
en na ñ heerlike, gesonde swangerskap... die ontnugtering van ñ "nood"-keiser a.g.v. pre-eklampsie... en dan die roete van prem-babas hê, wat elke meerling ouer weet is ñ moontlikheid, maar niemand jou op kan voorberei nie.

Na 40 dae in NICU is ons huis toe en die roetine (elke 3ure voed) was tegelykertyd vertroostend & "sieldodend" en so word hul groot en bereik die mylpaal van glimlag... tande kry  (nog iets waarop niemand jou kan voorberei!!!)... omrol... sit... kruip en opstaan. Wel, dìs hoe dit moes wees, maar by die omrol het ek begin onrustig voel... en toe Demar al lánkal sit & Zelé nog nie naastenby, het ek gevoel ons sal moet hulp en raad soek, alhoewel jy bly hoop op elkeen se uitspraak van: "sy sál sit... sommige babas vat net langer, jy sal sien..." so het ons reis begin: van Pediater, na Neuro-Fisioterapeut na Chiropraktisyn na Neuro-Arbeidsterapeut. ñ Reis van leer: hoe om haar te hanteer, hoe om jouself en jou opstandige emosies te hanteer, hoe verskillende mense in verskillende situasies die "onbekende" hanteer. Rede soek, self verwyt, vrede maak en dit weer verloor... nuwe woorde leer en veral leer bid... glo... vertrou en hoop. 

Want sien... Zelé het serebrale palsie ("cerebral palsy") en alhoewel sy pragtig (vir ons die pragtigste) en slim (vir ons die slimste) is, met die oplettendste geaardheid en ñ heerlike sin vir humor... loop sy nóg nie. Dis hier waar mens se idees en drome ook weer uitgedaag word, want wat is belangrik: dat sy onafhanklik is (met hulp van bv. ñ "walker "), of dat sy... sonder "walker ", met moeite loop? 

En dan besef jy weer die waarheid: dat jy énigiets vir jou kind(ers) sal doen: selfs jou drome oor-droom en aanpas, want... "geloof, hoop en liefde bly, hierdie drie. En die grootste hiervan is die liefde!"
1 Kor. 13:13 (Afr 1983 vertaling)


Opmerkings

Plaas 'n opmerking

Gewilde plasings van hierdie blog

Geld wat stom is...

-
Prent
... maak reg wat krom is, lui die spreekwoord mos. En dis nogal ñ slim spreekwoord daardie wat in heelwat omstandighede gebruik kan word. (Een van een van die Gymlede se luukse karre... Roux kan nie die prys nuut opspoor nie, maar daar is een tweedehands met 1900km op die klok... vir R4,2miljoen rand) Maar dat dit stom is, is so... en daarom voel ek verplig om die stommegeid met ñ paar "gevleulde woorde" te vul. VISA het dit nie ver mis met hul prys wat hulle op sekere dinge in hul advertensie sit & dan is die situasie "priceless" nie en ons stem heelhartig daarmee saam, dis hoekom ons dit so maklik ons eie gemaak het met na-geaapte Facebook statusse ens. Want dit is so... daar ìs dinge wat geld nie kan koop nie, maar dan is daar ook die dinge wat gekoop word, wat die geldelike waarde nie ñ akkurate indikasie gee van hoeveel dit eintlik werd is nie. Laat ek verduidelik... Geld, volgens my... het twéé waardes: ñ numeriese waarde (R20 is R20)... maar d...
Lees meer

...soos 'n Koning Rooibekkie...

-
Prent
Hierdie is 'n foto van 'n Koning Rooibekkie ("Pin-tailed Whydah", vir die wat in Ingels voëls kyk)... en soos mens duidelik op die foto kan sien is hy 'n bakleier. Hy duld nie ander voëls in dít wat hy voel sý gebied is nie (dalk is die foto van 'n mannetjie, wat 'n wyfie probeer verlei ek weet nou nie, want ek is nie so goed met die identifisering nie en die arme vroutjies in die voëlkoninkryk trek mos maar aan die kortste ent wat "looks" betref)... inelkgeval... die Koning Rooibekkie herhinner my aan 'n Jack Russell hondjie, wat dink hy is 'n Doberman en wat al wat hond is aanvat, selfs al is hul twee maal sy grootte. So sal die Koning Rooibekkie ook nie skroom om die duiwe weg te jaag, wat BAIE groter as hy is nie. En die duiwe skrik, hoor! Maar daar is ook ander voëls, wat hulle nie steur aan die lawaaierige voël, met sy lang stert nie, soos die Lysters... en hul eet lustig/rustig voort. Wat interessant is van die Koning Rooibekk...
Lees meer

Die identiteit stryd...

-
Prent
Een oggend gesels ek en 'n hartsvriendin so tussen-deur haar gym sessie oor die dinge wat pla, die dinge wat frustreer en irriteer en bekommer. Sy is 'n Ma van 3 laerskool seuns met 'n man wat sy eie besigheid en boerdery het en uit 'n familie kom wat sport-mal is, so sy is besig! Verder het sy ook 'n "A-tipe" persoonlikheid, soos sy dit noem, en dis eintlik maar net 'n lettertjie vir iemand wat perfeksionisties is en hou van detail. Wat wonderlik is vir haar man en seuns en mense, maar nogal erge druk op haarself sit, want daar is net sòveel ure in 'n dag, mens kan net sò vinnig van Witrivier af Nelspruit toe ry en daar is net sòveel detail, wat jyself kan doen, en daarna het jy òf hulp nodig (dié tipe persoonlikheid vra ook nie maklik vir hulp nie), òf jy moet, tot jou eie frustrasie dit net los... En ek kry hierdie openbaring, terwyl ons gesels, wat ek voel ek moet neerpen voordat dit verdwyn, 'n openbaring oor die vrou se identiteit stryd.....
Lees meer